18 сәуірде Каспий өңірінің көпсалалы жоғары колледжінің кітапханасында қазақтың көрнекті жазушысы, ғалым, қоғам қайраткері, академик Сәбит Мұқановтың туғанына 125 жыл толуына орай білім алуышлар арасында оқу-танымдық конференциясы өтті.
Іс-шараның мақсаты-студенттердің Сәбит Мұқановтың өмірі мен шығармашылық жолы туралы түсініктерін кеңейту, Қазақстанның әдеби мұрасына деген қызығушылығын ояту, кітап оқу мәдениеті мен рухани құндылықтарын қалыптастыру.
Конференцияға колледж студенттері мен Х. Досмұхамедов атындағы Атырау университетінің студент-практиканттары қатысты. Іс-шара қонақтары арасында №1 қалалық көшпелі кітапхананың кітапханашысы Рахметова А. Н. және «Сенім» элитарлық мектеп—балабақша кешенінің кітапханашысы Өмірзақова Х. К. болды.
Конференция барысында студенттер баяндамалар, шығармашылық жобалар, өлеңдерді мәнерлеп оқу және жазушының шығармаларына әдеби талдау жасады. Сәбит Мұқанов XX-ғасырдағы қазақ және кеңестік тарихтың негізгі оқиғаларын – революцияға дейінгі балалық шақ пен Қазан төңкерісінен бастап ұжымдастыру, қуғын-сүргін және Ұлы Отан соғысы қасіреттеріне дейінгі асқан шынайылық пен тереңдікпен бейнелеген «Өмір мектебі» өмірбаяндық трилогиясына ерекше назар аударылды.
Сондай-ақ, жазушының, «Ботакөз», «Сұлушаш» сынды көркем шығармалары, Шоқан Уәлиханов туралы «Аққан жұлдыз» өмірбаяндық романы да қаралды. Бұл шығармалар жеке тұлғаның, халықтың және Отанның тағдыры, рухани төзімділік, туған жерге деген сүйіспеншілік пен мәдениетке деген құрмет туралы ой толғауға негіз болды.
Конференция аясында қатысушылар Сәбит Мұқановтың романдарындағы әйелдер бейнесі тақырыбын қозғады. Автор өзінің кейіпкерлері арқылы эмансипацияның маңызды мәселелерін, әйелдің отбасы мен қоғамдағы рөлін, сондай-ақ өзінің қадір-қасиеті мен махаббат құқығы үшін күресті көтеретіні атап өтілді.
Конференцияға қатысушылар Сәбит Мұқановтың шығармашылығы бүгінгі күні де өзектілігін сақтап отырғанын, өйткені ол адамгершіліктің, ұлттық бірегейліктің және адамдық қадір-қасиеттің мәңгілік тақырыптарын көтергенін атап өтті. Оның әдеби мұрасы-қазақ мәдениетінің маңызды бөлігі, болашақ ұрпақ үшін шабыт пен мақтаныш көзі.
Конференция сөзге деген терең құрмет, ой толғау және әдебиетке деген ыстық ықылас атмосферасында өтті. Мұндай іс-шаралар жастардың ой-өрісін кеңейтіп қана қоймай, өз халқының тарихымен, мәдениетімен байланысын сезінуге септігін тигізеді.
Сәбит Мұқанов – шын мәнінде қазақ әдебиеті тарихында жарқын із қалдырған ұлы тағдыр иесі. Оның даусы шығармаларының беттерінде жаңғырып, бізді ойлауға, сезінуге және есте сақтауға итермелейді.
